ត្រូវឲ្យស្គាល់ព្រះហើយជឿតាម

១- រឺរឿងដែលថ្លែងពីព្រះគ្រីស្ត តើយើងនឹងរិះគិតយ៉ាងណា ដ្បិតទ្រង់ជាព្រះរាជបុត្រា នៃព្រះបិតាដ៏ប្រពៃ។

២- ព្រះអង្គជាព្រះអាទិកពិត ជាព្រះមានឫទ្ធិតេជះល្បី ព្រមទាំងចេស្តាព្រះបារមី តើដោយហេតុអ្វីគេធ្វើគុត។

៣- បើទ្រង់មានគ្រប់ព្រះចេស្តា ហេតុអ្វីបានជាចៀសមិនផុត មហាទេវតាដែលបរិសុទ្ឋ នាំគ្នាក្រាបលុតបង្គំទ្រង់។

៤- យើងថ្លែងម្ដងទៀតស្រាយប្រស្នា ដើម្បីដោះសាដោយស្មោះត្រង់ ដែលមានក្នុងសាសនាព្រះអង្គ រៀបទុកផ្ចិតផ្ចង់យ៉ាងប្រពៃ។

៥- ដូចជាបានចែងក្នុងគម្ពីរ សម្តែងឫទ្ធីធំពេកក កំចាត់ទុច្ចរិតផុតនិស្ស័យ រួចក៏ប្រល័យបាបបានស្បើយ។ 

៦- យើងថ្លែងពីរឿងទ្រង់សុគត បីថ្ងៃកំណត់រស់វិញហើយ ទ្រង់រស់ប្រាកដឱអ្នកអើយ មិនស្លាប់ទៀតឡើយដរាបហោង ។

៧- ដែលទ្រង់សុគតបីថ្ងៃនោះ គឺយកឈាមលោះបាបមនុស្សផង ទាំងអ្នកទាំងខ្ញុំរួចហើយហោង ស៊ូប្ដូរតែម្ដងសម្រេចការ។

៨- តាមក្រឹត្យវិន័យរបស់ទ្រង់ ប្រទានមកក្នុងលោកិយរា ឲ្យយើងប្រតិបត្តិក្នុងចិន្តា មិនឲ្យអ្នកណាខុសវិន័យ។

៩- ទី១បាបមិនស្គាល់ព្រះអង្គ រង្វងឆ្ងាយបង់ក្នុងលោកិយ លើកមនុស្សជំនួសព្រះវិញខ្ចី ឬយកអ្វីៗធ្វើព្រះហោង។

១០- ឯបាបទី២ ភ្លេចគុណព្រះ អួតខ្លួនចេះណាស់ជាងមនុស្សផង ធ្វើឫកយ៉ាងនោះចិត្តសៅហ្មង យើងអួតរំលងព្រះហើយវៃ។

១១- ទី៣ គឺបាបជាសម្រេច បាបផ្តន្ទាផ្តាច់មនុស្សលោកិយ កាន់ចិត្តមោហោមិនដឹងអី ស្លាប់ទៅបានអ្វីជាទីពឹង។

១២- រៀនមិនចេះដល់មិនស្គាល់ត្រូវ កំពុងយើងនៅរូបកាយហ្នឹង ធ្វើឥតបើគិតមិនរំពឹង ប្រាកដជានឹងវិនាសហើយ។ 

១៣- គេប្រាប់ព្រះនាមព្រះសង្រ្គោះ ឲ្យចិត្តជឿចុះកុំឆ្ងល់ឡើយ កុំឲ្យអួតខ្លួនធ្វើកន្តើយ តបឆ្លើយដោយពាក្យថាព្រះអ្វី។

១៤- ឯព្រះប្រាកដមានតែមួយ ដែលអាចនឹងជួយគ្មានពីរបី ទោះលើឋានសួគ៌ឬផែនដី គ្មាននាមឈ្មោះអ្វីណាទៀតសោះ។

១៥- មានត្រឹមតែនាមព្រះយេស៊ូ ព្រះអង្គទ្រង់ប្តូរដោយត្រង់ស្មោះ ទ្រាំឲ្យគេឆ្កាងយកឈាមលោះ បាបមនុស្សទាំងអស់ក្នុងលោកិយ។

១៦- ក្នុងសញ្ញាចាស់បានពន្យល់ រហូតមកដល់សញ្ញាថ្មី ដំណឹងល្អបួនផ្ទួនសេចក្តី មិនឲ្យឆ្ងល់អ្វីសង្ស័យឡើយ។

១៧- បើយើងនឹងយកផ្លូវប្រាជ្ញា មកពិចារណាបងប្អូនអើយ ប្រាកដជានឹងឃើញច្បាស់ហើយ គ្មានកំបាំងឡើយក្នុងវិញ្ញាណ។

១៨- មានបទមួយទៀតែចងមកច្បាស់ បើយើងជឿព្រះ ព្រះបង្រៀន ត្រូវខិតខំស្តាប់ដំបូន្មាន ក្រែងទៅមុខខានបានស្គាល់ព្រះ។

១៩- ខ្លួនទីពឹងខ្លួនមិនបានឡើយ រកផ្លូវឲ្យហើយយ៉ាងរហ័ស ដល់ស្លាប់ចោលខ្លួនទៅស្រឡះ បើយើងពឹងព្រះនោះទើបត្រូវ។

២០- ដ្បិតអីវិញ្ញាណយើងគ្មានស្លាប់ ដូចយើងដឹងស្រាប់ហើយឥឡូវ ដល់ព្រលឹងចាកចោលខ្លួនទៅ នោះតើយើងត្រូវពឹងអ្នកណា។

២១- ច្នេះគួរយើងពឹងព្រះវិញ្ញាណ ដ្បិតព្រះអង្គមានគ្រប់ចេស្តា បង្កើតវិញ្ញាណគ្រប់រូបា ទ្រង់ថែរក្សាដោយត្រង់ស្មោះ។

២២- ព្រះទ្រង់ញាណមានគ្រប់ចេស្តា ព្រះគុណករុណាអាចប្រោសលោះ មានទាំងព្រះទ័យដ៏សប្បុរស ខ្ពស់លើសទាំងអស់គ្មានផ្ទឹមដល់។

២៣- សម្បត្តិព្រះអង្គក៏មានគ្រប់ ទ្រង់ដាក់ក្នុងភពទុកតម្កល់ សម្រាប់អស់មនុស្សផងគ្មានសល់ សុទ្ធតែយោបល់ព្រះទាំងអស់។

២៤- ការខំធ្វើបុណ្យកសាងនោះ រកព្រះសង្គ្រោះមិនឃើញសោះ បើយើងសូមព្រះទ្រង់នឹងដោះ ឲ្យរួចទាំងអស់ដោយព្រះឫទ្ឋិ។

២៥- ហេតុនេះយើងត្រូវតែទាញយក ព្រះគម្ពីរមករំពឹងគិត រកឫសរកគល់ឲ្យយល់ពិត រួចត្រូវថ្វាយចិត្តជឿប្រាកដ។

២៦- កុំឲ្យប្រកាន់ព្រះយើងគេ ត្រូវតែរិះរេយ៉ាងម៉ត់ចត់ ពិនិត្យខុសត្រូវតាមបែបបទ តាមព្រះកំណត់ទុកមកហើយ។

២៧- កុំឲ្យពីងខ្លួននោះវាខុស គួរពឹងព្រះចុះកុំកន្តើយ ព្រោះព្រះមានឫទ្ឋិពិតអ្នកអើយ អំណាចទ្រង់ហើយធំជាងគេ។

២៨- ព្រះពិតប្រាកដទ្រង់ទៀងត្រង់ គួរតាមព្រះអង្គចុះកុំរេ ខ្លួនទីពឹងខ្លួនមិនរួចទេ ចូរឈឺចិត្តបែរពីបាបបង់។ 

២៩- លន់តូសូមទោសចំពោះព្រះ លើកដៃសំពះថ្វាយខ្លួនផង ដោយជឿឥតខ្ចោះចិត្តស្មោះត្រង់ នោះទើបព្រះអង្គប្រោសរួចពិត។

៣០- អ្នកនឹងបានកើតជាថ្មីផង វិញ្ញាណព្រះហោងមកសណ្ឋិត សម្តែងឫទ្ឋិបំផ្លាស់ចិត្ត ជាកូនព្រះពិតដោយបារមី។

៣១- ច្នោះទើបបានគ្រងមរតកទ្រង់ មានឫទ្ធីផងមានសួរស្តី ជីវិតអស់កល្បល្អឥតបី ចូរជឿឃ្មាតខ្មីបងប្អូនអើយ។