ចម្រៀងនាងមារីយ៉ា

១-   វិញ្ញាណខ្ញុំសុំលើកតម្កើង                ព្រះដ៏រុងរឿងម្ចាស់លោកា

      ចិត្តខ្ញុំត្រេកអរឥតឧបមា                 នឹងការសង្គ្រោះនៃម្ចាស់ថ្លៃ។

២-   ព្រះជាអម្ចាស់ថ្ងៃឧត្តម                  ទតមើលមកខ្ញុំរាល់យប់ថ្ងៃ

      ជាអ្នកបម្រើដ៏ក្រក្រី                      ទ្រង់ប្រោសប្រណីជួយសង្គ្រោះ ។

៣-   អំណើះតទៅគ្រប់សម័យ               មនុស្សក្នុងលោកិយនេះទាំងអស់

       តែងពោលសរសើរខ្ញុំដោយស្មោះ      ថាមានកេរ្តិ៍ឈ្មោះភព្វវាសនា។

៤-   ព្រះអង្គមានឫទ្ឋិលើសជាងស្ដេច        ទ្រង់បានសម្រេចការអស្ចារ្យ

      សង្គ្រោះរូបខ្ញុំដោយមេត្តា               ព្រះអង្គពិតជាសន្តវិសុទ្ឋ។

៥-   មេត្តាករុណានៃព្រះអង្គ                 ល្អល្អះត្រចង់ប្រសើរផុត

      ប្រោសប្រណីអស់អ្នកក្រខ្សត់           មានចិត្តអំណត់ចេះកោតខ្លាច។

៦-   ព្រះអង្គកំចាត់ជនឆ្មើងឆ្មៃ               ដកសិទ្ធិពីដៃអ្នកកោងកាច

      លើកជនសុភាពឲ្យអង់អាច             ឲ្យកាន់អំណាចមានសីលធម៏។

៧-   ព្រះអង្គជាម្ចាស់បានប្រទាន            ដល់អ្នកស្រេកឃ្លានហើយទ័លក្រ

       ទ្រង់ដេញអ្នកមានអមនុស្សធម៏        ឲ្យចាកចេញចរដៃទទេ។

៨-    ព្រះអង្គលើកស្ទួយជួយរំដោះ          កូនចៅទាំងអស់ឥតសល់ទេ

       ព្រោះទ្រង់នឹកចាំមិនភ្លេចគេ            ព្រះទ័យរិះរេជួយសង្គ្រោះ។

៩-   តាមព្រះបន្ទូលដ៏ប្រពៃ                  ថានឹងប្រណីបុព្វបុរស

       លោកអ័ប្រាហាំព្រមទាំងអស់          ពូជពង្សរបស់លោករឿងទៅ។